óléttubann og illa þýddar fréttir

Skemmtileg lesning á RÚV í dag um að hershöfðingi nokkur í Írak hefði gert það að brottrekstrarsök ef hermenn undir hans stjórn yrðu óléttir. Það fer einstaklega í taugarnar á mér þegar talað er um ólétta menn, en í fréttinni er sérstaklega tekið fram að viðurlögin eigi bæði við um karla og konur. Þetta yrðu nú fréttir til næsta bæjar, að karlarnir í hernum gætu orðið óléttir.

En viti menn - Guardian segir okkur að viðurlögin eigi við um konur sem verða barnshafandi og karlana sem eiga þátt í getnaðinum. Ég veit að það er undirmannað á fréttastofum landsins þessa dagana, en það hlýtur einhver að gera athugasemdir þegar ekki er bara um málfræðivillur að ræða, heldur hreinlega atburði sem stangast á við raunveruleikann.

Svo má auðvitað velta því fyrir sér hversu breyttir tímarnir hljóta að vera, að hershöfðingjar séu farnir að finna fyrir áhrifum óléttu á framboð á hermönnum. 

fundið

Ég auglýsti um helgina eftir betra orði en "fegrunaraðgerðir" og "lýtaaðgerðir" til að lýsa aðgerðum sem fólk fer í til að útlit þeirra falli betur að kröfum heimsins. Þær stöllur Bryndís Jóhannsdóttir og Katrín Anna Guðmundsdóttir fundu í Facebook umræðu orð sem mér finnst fullkomið, en það er "stöðlunaraðgerðir". Legg til að þetta orð verði notað í framtíðinni um svokallaðar fegrunaraðgerðir.

sá yðar

Ég horfði á fallega sögu í Kastljósinu í kvöld, um fólk sem fékk ósk sína að eignast barn uppfyllta á næstum óraunverulegan hátt. Mér hreinlega vöknaði um augu. Svo kom sálfræðingur frá Barnaverndarstofu í heimsókn til Þóru og gaf góða lýsingu á fósturkerfinu hér á landi, en þetta er kerfi sem margir þekkja ekki til og gerir ótrúlega hluti fyrir fjölda barna á hverju ári. Svo spurði Þóra hann út í það hversu algengt það væri að konur gæfu frá sér nýfædd börn, og hvort sá möguleiki væri kynntur sem valkostur við fóstureyðingu. Þá sagði maðurinn: "Sá sem er að fæða barn, hann...". Og þá hætti ég að heyra. Þetta er sennilega ástæðan fyrir því að svo mörgum finnst fáránlegt að breyta heitunum á ráðherrum og forstjórum - fólk gerir sér ekki grein fyrir því hvað kynjun tungumálsins getur verið fáránleg.